|
| 正月份期指結算完後, 發覺淡友喺22900-23200嘅位置做淡倉, 加上政策市, 期油價格新高帶動下, 所以原本估計正確, 頭兩個星期港股嚴重積弱, 成交淡靜, 不足五百億都試過, 而6月20日更加係大戶做市嘅籍口, 上晝恆指企穩二萬三收市, 下晝跌穿二萬二千八, 但係全日大部分時間期指都維持高水狀態, 即係好友想喺六月贏多場, 應該會企返二萬三千樓上, 係就要睇睇戲喇....... 今個月係我一個人生幾特別嘅一個月, 因為發生咗幾件大事.
首先就係向梁志威師父(而家叫大師父...)正式拜師!! 過程, 儀式雖然好簡單, 但係當我眼見師父喺我向佢行拜師禮期間雙眼通紅, 就清楚自己一定要呢一世都要好似自己父親咁對佢, 因為佢對我嘅影響太深喇.
第二都係拜師....不過係拜林偉仁師父(我哋叫佢個網名「樹影」多啲, 所以叫「樹影老師」...), 呢位係教我意拳, 太極功陰陽廿四式同埋......飲紅酒!! 因為佢同時係香港討論區紅酒版嘅網上酒評家! 我近來飲咁多靚紅酒都係佢介紹架!! 哈哈!!
第三樣就係自己嘢喇, 自己諗通咗啲嘢, 多謝我哋嘅「白紙紅棍」, 有機會再分享啦~ | | |
| 五月份期指結算日, 恆指收報24383點, 升134點, 成交依然淡靜, 只有640億8千幾萬, 五月份期指結算價24346. 六月份期指收市報24352, 升179點, 成交61284張, 未平倉合約為90456張. | | |
| 近來有留意股市的話, 應該知道恆指喺低位20,500點, 一路升到上琴日(5月2日)26,241點, 升咗5741點, 成交開始增加到每日平均八百至九百億. 有啲「報導」仲話好友仲有力, 會一路炒上27,000點, 什至28,000點添, 到底係咪真係咁好呢? 其實淡友喺三月已經開始累積淡倉, 一路放過好友, 就係等呢一舖. 試想想, 如果淡友喺三月恆生指數開始炒上嚟嗰陣開始做期指淡倉, 到而家應該累積有三萬至四萬張未平倉合約, 如果星期一恆指跌5741點, 而$50一點恆指嚟計, 一張期指合約已經賺到$287,050, 假設全部淡友大概有35,000張未平倉合約, 全部喺星期一平倉, 淡友大概賺到$10,046,750,000! 當然冇可能咁啦, 不過大家要小心手頭上嘅持貨. | | |
| 4月29日, 今日係期指結算日, 四月份期指結算價係25918, 升249點, 成交13197張, 未平倉合約53142張, 低水33點... | | |
| 講講3 月 5 日先啦, 恆指跌成一千一百幾點, 成交終於破1000億喇!! 不過, 有成130幾億係新股上市嘅中鐵建嘅...即係實際大市都係得800零億成交, 而當日期指收市都低水成200幾點. 而今日3 月 6 日, 恆指全日都冇乜方向, 開市升200幾點, 亦曾經升超過400幾點, 但係晏晝收市前一個鐘, 開始倒跌, 試過跌超過140點, 下晝返來一時升, 一時跌, 但係叫做窄幅上落, 收市恆指係22237點, 跌64點, 全日成交882億8千3百幾萬, 三月份期指係22132點, 升37點, 較現貨低水105點, 成交82295張. 琴日就淡友挾好倉, 今日就反覆, 今月尾應該維持原判, 淡友贏返場, 但係下個月點呢, 就要睇伯南克下個星期點講喇, 道指期貨雖然顯示減息75點子嘅機會越來越高, 不過已經咁低息喇, 可唔可以真係幫助到投資者對美國信貸市場嘅信心. 其實接二連三嘅資產減值嘅消息傳出, 市場對「減息」呢兩個字嘅「心跳指數」應該越來越低....跟住會點呢, 等我都跟住學吓嘢先! | | |
|
